Zurück

	Neapolitanische Lieder
	> FENESTA CA LUCIVE > FUNICULI' - FUNICULA' > 'O SOLE MIO > I' TE VURRIA VASA' > TORNA A SURRIENTO > NINI' TIRABUSCIO' >'O SURDATO NNAMMURATO >'O PAESE D''O SOLE > DICITENCELLO VUJE > SCALINATELLA > LUNA ROSSA > MALAFEMMENA >GUAGLIONE > RESTA CU ME!
	FENESTA CA LUCIVE - Unbekannt
	Fenesta ca lucive e mo nun luce... sign'è ca nénna mia stace malata... S'affaccia la surella e mme lu dice: Nennélla toja è morta e s'è atterrata... Chiagneva sempe ca durmeva sola, mo dorme co' li muorte accompagnata... II Va' dint''a cchiesa, e scuopre lu tavuto: vide nennélla toja comm'è tornata... Da chella vocca ca n'ascéano sciure, mo n'esceno li vierme...Oh! che piatate! Zi' parrocchiano mio, ábbece cura: na lampa sempe tienece allummata... III Addio fenesta, rèstate 'nzerrata ca nénna mia mo nun se pò affacciare... Io cchiù nun passarraggio pe' 'sta strata: vaco a lo camposanto a passíare! 'Nzino a lo juorno ca la morte 'ngrata, mme face nénna mia ire a trovare!...
	FUNICULI' - FUNICULA' - Turco - Denza
	Aisséra, Nanninè', mme ne sagliette, tu saje addó'... Tu saje addó'... Addó', 'sto core 'ngrato, cchiù dispiette farme nun pò... Farme nun pò! Addó' lo ffuoco coce, ma si fuje, te lassa stá... Te lassa stá. E nun te corre appriesso e nun te struje sulo a guardá... Sulo a guardá... Jammo, jammo, 'ncoppa jammo ja'... Jammo, jammo, 'ncoppa jammo ja'... Funiculí - funiculá, funiculí - funiculá... 'Ncoppa jammo ja', funiculí - funiculá.... II Nèh jammo: da la terra a la montagna, no passo nc'è... No passo nc'è... Se vede Francia, Pròceta, la Spagna... e io veco a te! E io veco a te... Tiráte co li ffune, ditto 'nfatto, 'ncielo se va... 'Ncielo se va... Se va comm'a lo viento e, a ll'intrasatto, gué saglie sá'... Gué saglie sá'... Jammo, jammo, ......................... III Se n'è sagliuta, oje né', se n'è sagliuta, la capa giá... La capa giá.. E' ghiuta, po' è tornata, po' è venuta... Sta sempe ccá... Sta sempe ccá... La capa vota vota attuorno, attuorno, attuorno a te... Attuorno a te... Lo core canta sempe no taluorno: Sposammo, oje né'... Sposammo, oje né'... Jammo, jammo, .........................
	'O SOLE MIO - Capurro - Di Capua
	Che bella cosa na jurnata 'e sole!... N'aria serena doppo a na tempesta... Pe' ll'aria fresca pare giá na festa... Che bella cosa na jurnata 'e sole!... Ma n'atu sole cchiù bello, oje né', 'o sole mio, sta 'nfronte a te... 'O sole, 'o sole mio, sta 'nfronte a te... sta 'nfronte a te! II Lùceno 'e llastre d''a fenesta toja; na lavannara canta e se ne vanta... e pe' tramente torce, spanne e canta, lùceno 'e llastre d''a fenesta toja... Ma n'atu sole ..................... III Quanno fa notte e 'o sole se ne scenne, mme vène quase na malincunia... sott''a fenesta toja restarría, quanno fa notte e 'o sole se ne scenne... Ma n'atu sole ......................
	I' TE VURRIA VASA' - V. Russo - Di Capua
	Ah! Che bell'aria fresca... Ch'addore 'e malvarosa... E tu durmenno staje, 'ncopp'a sti ffronne 'e rosa! 'O sole, a poco a poco, pe' stu ciardino sponta... 'o viento passa e vasa stu ricciulillo 'nfronte! I' te vurría vasá... I' te vurría vasá... ma 'o core nun mm''o ddice 'e te scetá... 'e te scetá!... I' mme vurría addurmí... I' mme vurría addurmí... vicino ô sciato tujo, n'ora pur'i'... n'ora pur'i'!... II Tu duorme oje Rosa mia... e duorme a suonno chino, mentr'io guardo, 'ncantato, stu musso curallino... E chesti ccarne fresche, e chesti ttrezze nere, mme mettono, 'int''o core, mille male penziere! I' te vurría vasá... ............................ III Sento stu core tujo ca sbatte comm'a ll'onne! Durmenno, angelo mio, chisà tu a chi te suonne... 'A gelusia turmenta stu core mio malato: Te suonne a me?...Dimméllo! O pure suonne a n'ato? I' te vurría vasá... ............................
	TORNA A SURRIENTO - E. De Curtis - G. B. De Curtis
	Vide 'o mare quant'è bello! spira tanta sentimento... Comme tu, a chi tiene mente, ca, scetato, 'o faje sunná! Guarda guá' chisti ciardine, siente sié' sti sciure 'arancio... nu prufumo accussí fino, dint''o core se ne va... E tu dice: "Io parto, addio!" T'alluntane da stu core... Da la terra de ll'ammore, tiene 'o core 'e nun turná?! Ma nun mme lassá, nun darme stu turmiento... Torna a Surriento: famme campá!... II Vide 'o mare de Surriento che tesore tene 'nfunno: Chi ha girato tutt''o munno, nun ll'ha visto comm'a ccá! Guarda, attuorno, sti Sirene ca te guardano 'ncantate e te vònno tantu bene: Te vulessero vasá!... E tu dice: "Io parto, addio!" .............................
	NINI' TIRABUSCIO' - Califano - Gambardella
	Chillu turzo 'e mio marito nun se pò cchiù suppurtá! Ll'aggi''a cósere 'o vestito: Mm'aggi''a mettere a cantá! Tutto è pronto! Stó' aspettanno na scrittura p''a firmá: Nun appena che mm''a danno, vaco fore a debuttá! Ho scelto un nome eccentrico: "Niní Tirabusciò" Oh! Oh! Oh! Oh! Oh! Oh! Addio mia bella Napoli, mai più ti rivedrò!... Oh! Oh! Oh! Perderai Tirabusciò! II Ne cunosco tante e tante ca nun só' cchiù meglio 'e me... e cu 'e llire e cu 'e brillante só' turnate da 'e tturné... 'A furtuna, s'è capito, 'ncopp''e ttavule se fa!... Ca fatiche e ghiétt''acito, che risorse puó' sperá?... Aíz''a vesta, smuóvete! E' ll'epoca ch''o vvò'... Oh! Oh! Oh! Oh! Oh! Oh! Addio mia bella Napoli, mai più ti rivedrò!... Oh! Oh! Oh! Perderai Tirabusciò! III Pe' cantá nun serve 'a voce, è 'o partito ca nce vò'... po' 'e ccanzone miette 'ncroce ca faje "bisse" quante vuó'! Dai il tuo cuore 'ncopp''a piazza ai più ricchi "abitué..." Vide po' si 'un fanno 'a mazza ll'ate artiste 'nnanze a te! E' chesta 'a vera tattica 'e na sciantosa 'e mo... Oh! Oh! Oh! Oh! Oh! Oh! Addio mia bella Napoli, mai più ti rivedró!... Oh! Oh! Oh! Perderai Tirabusciò!
	'O SURDATO NNAMMURATO - Califano - Cannio
	Staje luntana da stu core, a te volo cu 'o penziero: niente voglio e niente spero ca tenerte sempe a fianco a me! Si' sicura 'e chist'ammore comm'i' só' sicuro 'e te... Oje vita, oje vita mia... oje core 'e chistu core... si' stata 'o primmo ammore... e 'o primmo e ll'ùrdemo sarraje pe' me! II Quanta notte nun te veco, nun te sento 'int'a sti bbracce, nun te vaso chesta faccia, nun t'astregno forte 'mbraccio a me?! Ma, scetánnome 'a sti suonne, mme faje chiagnere pe' te... Oje vita.... III Scrive sempe e sta' cuntenta: io nun penzo che a te sola... Nu penziero mme cunzola, ca tu pienze sulamente a me... 'A cchiù bella 'e tutt''e bbelle, nun è maje cchiù bella 'e te! Oje vita....
	'O PAESE D''O SOLE - Bovio - D' Annibale
	Ogge stó' tanto allero ca, quase quase, mme mettesse a chiagnere pe' 'sta felicitá... Ma è overo o nun è overo ca só' turnato a Napule? Ma è overo ca stó' ccá? 'O treno steva ancora 'int''a stazione quanno aggio 'ntiso 'e primme manduline... Chist'è 'o paese d''o sole, chist'è 'o paese d''o mare, chist'è 'o paese addó' tutt''e pparole, só' doce o só' amare, só' sempe parole d'ammore! II 'Sta casa piccerella, 'sta casarella mia 'ncoppo Pusilleco , luntano, chi t''a dá?... 'Sta casa puverella, tutt'addurosa 'anèpeta, se putarría pittá: 'A ccá nu ciardeniello sempe 'nfiore e de rimpetto 'o mare, sulo 'o mare!!! Chist'è 'o paese d''o sole, ......................................... III Tutto, tutto è destino... Comme putevo fá furtuna a ll'estero s'io voglio campá ccá? Mettite 'nfrisco 'o vino!... Tanto ne voglio vévere, ca mm'aggi''a 'mbriacá... Dint'a sti qquatto mure io stó' cuntento: mamma mme sta vicino e nénna canta: Chist'è 'o paese d''o sole, .........................................
	DICITENCELLO VUJE - Fusco - Falvo
	Dicitencello a 'sta cumpagna vosta ch'aggio perduto 'o suonno e 'a fantasia... ch''a penzo sempe, ch'è tutt''a vita mia... I' nce 'o vvulesse dicere, ma nun ce 'o ssaccio dí... 'A voglio bene... 'A voglio bene assaje! Dicitencello vuje ca nun mm''a scordo maje. E' na passione, cchiù forte 'e na catena, ca mme turmenta ll'anema... e nun mme fa campá!... II Dicitencello ch'è na rosa 'e maggio, ch'è assaje cchiù bella 'e na jurnata 'e sole... Da 'a vocca soja, cchiù fresca d''e vviole, i' giá vulesse sèntere ch'è 'nnammurata 'e me! 'A voglio bene... .......................... III Na lácrema lucente v'è caduta... dicíteme nu poco: a che penzate?! Cu st'uocchie doce, vuje sola mme guardate... Levámmoce 'sta maschera, dicimmo 'a veritá... Te voglio bene... Te voglio bene assaje... Si' tu chesta catena ca nun se spezza maje! Suonno gentile, suspiro mio carnale... Te cerco comm'a ll'aria: Te voglio pe' campá!...
	SCALINATELLA - Bonagura - Cioffi
	Scalinatèlla, longa longa longa longa Strettulélla strettulélla, addó' sta chella 'nnammuratèlla? Nun spónta ancora... zuc zuc zuc zuc: zucculillo zucculillo, pe' 'sta viarèlla scarrupatèlla! Addó' mme ne vogl'í, t''o ddico...e crídeme... addó' se ne pò ghí chi è stanco 'e chiágnere?! Scalinatèlla saglie 'ncielo o scinne a mare cercammélla trovammélla, pòrtame a chella sciaguratèlla! Chella s'è 'nnammurata 'e nu pittore ca pitta Capre e parla furastiero... e i' porto 'mpiétto nu dulore 'e core e sento che mm'accide stu penziero! Scalinatèlla longa longa ecc. A ghiuorne a ghiuorne parte nu vapore... A ghiuorne 'ammore mio se vótta a mare!
	LUNA ROSSA - Vian - De Crescenzo
	Vaco distrattamente abbandunato... Ll'uocchie sott''o cappiello annascunnute, mane 'int''a sacca e bávero aizato... Vaco siscanno ê stelle ca só' asciute... Fischio......................... E 'a luna rossa mme parla 'e te, Io lle domando si aspiette a me, e mme risponne: "Si 'o vvuó' sapé, ccá nun ce sta nisciuna..." E i' chiammo 'o nomme pe' te vedé, ma, tutt''a gente ca parla 'e te, risponne: "E' tarde che vuó' sapé?! Ccá nun ce sta nisciuna!..." Luna rossa, chi mme sarrá sincera? Luna rossa, se n'è ghiuta ll'ata sera senza mme vedé... E io dico ancora ch'aspetta a me, for''o barcone stanott'ê ttre, e prega 'e Sante pe' mme vedé... Ma nun ce sta nisciuna... II Mille e cchiù appuntamente aggio tenuto... Tante e cchiù sigarette aggio appicciato... Tanta tazze 'e café mme só' bevuto... Mille vucchelle amare aggio vasato.... Fischio......................... E 'a luna rossa mme parla 'e te, ...................................................
	MALAFEMMENA - Totò
	Si avisse fatto a n'ato chello ch'hê fatto a me, st'ommo t'avesse acciso... e vuó' sapé pecché? Pecché 'ncopp'a 'sta terra, femmene comm'a te, nun ce hann''a stá pe' n'ommo onesto comm'a me... Femmena, tu si' na malafemmena... a st'uocchie hê fatto chiagnere, lacreme 'e 'nfamitá... Femmena, tu si' peggio 'e na vipera, mm'hê 'ntussecato ll'ánema, nun pòzzo cchiù campá... Femmena, si' doce comm''o zzuccaro... peró 'sta faccia d'angelo, te serve pe' 'nganná! Femmena, tu si' 'a cchiù bella femmena... te voglio bene e t'odio: nun te pòzzo scurdá... II Te voglio ancora bene, ma tu nun saje pecché... pecché ll'unico ammore si' stato tu pe' me!... E tu, pe' nu capriccio, tutto hê distrutto oje né'... Ma Dio nun t''o pperdona chello ch'hê fatto a me... Femmena, .................
	GUAGLIONE - Nisa - Fanciulli
	Staje sempe ccá, 'mpuntato ccá, 'mmiez'a 'sta via, nun mange cchiù nun duorme cchiù che pecundría! Gué piccerí' che vène a dí 'sta gelusia? Tu vuó' suffrí, tu vuó' murí, chi t''o ffá fá... Curre 'mbraccio addu mammá, nun fá 'o scemo piccerí'... dille tutt''a veritá ca mammá te pò capí... E passe e spasse sott'a stu barcone, ma tu si' guaglione... Tu nun canusce 'e ffemmene, si' ancora accussí giovane! Tu si' guaglione!... Che t'hê miso 'ncapa? va' a ghiucá 'o pallone... Che vònno dí sti llacreme?... Vatté', nun mme fá ridere! Curre 'mbraccio addu mammá, nun fá 'o scemo piccerí'... Dille tutta 'a veritá ca mammá te pò capí...! II Nun 'e ppittá, nun 'allisciá sti mustacciélle... Nun cerca a te, nun só' pe' te chill'uocchie belle... Nun 'a penzá, va' a pazziá cu 'e guagliunciélle... Nun t'avvelí, c'è tiempo oje ni', pe' te 'nguajá! Chi desidere 'e vasá, scordatélla, piccerí', ca si 'o ddiceno a papá, chisá comme va a ferní... E passe e spasse sott'a stu barcone, ......................................................... Finale: Staje sempe ccá, 'mpuntato ccá, 'mmiez'a 'sta via... Nun mange cchiù, nun duorme cchiù... chi t''o ffá fá!...
	RESTA CU ME! - Verde - Modugno
	Ammore...Ammore...Ammore... Dimme tu che ll'aggi''a dí... dimme tu comm'aggi''a fá... stasera... dimane... p''a fá restá?!... Resta cu me pe' caritá! Statte cu me... nun mme lassá! Famme pená, famme 'mpazzí, famme danná... ma dimme sí!... Moro pe' te... vivo pe' te... Vita d''a vita mia... nun mme 'mporta d''o ppassato, nun mme 'mporta 'e chi t'ha avuto... resta cu me... cu me!...
Zurück
	© Azienda Autonoma di Soggiorno Cura e Turismo di Napoli Alle Rechte vorbehalten  design & engineering